e-Qazyna: мемлекеттік мүліктің бірыңғай цифрлы есебін енгізу жұмыстары басталды
ҚР Президенті жанындағы Орталық коммуникациялар қызметінде өткен брифингте Қаржы министрлігі өкілдері мемлекеттік мүлікті басқаруды цифрлендіру және e-Qazyna.kz платформасын дамыту жөніндегі жоспарларды таныстырды. Жоба ҚР ҚМ Мемлекеттік мүлік және жекешелендіру комитетінің төрағасы Нұрмахан Әділбеков пен «Ақпараттық-есепке алу орталығы» АҚ басқарма төрағасы Жанасыл Оспанов тарапынан баяндалды.
e-Qazyna сервистері және платформаның мақсаты
Бүгінде e-Qazyna жүйесінде 40 цифрлы сервис жұмыс істейді. Оларға мемлекеттік және квазимемлекеттік ұйымдарды есепке алу, электронды сауда-саттық, жекешелендіру, мүлікті жалға және сенімгерлік басқаруға беру, мемлекеттік меншікті мониторингтеу секілді негізгі қызметтер кіреді.
Негізгі мақсат — мемлекеттік активтердің бытыраңқы есебін тоқтатып, олардың біртұтас цифрлы базасын қалыптастыру. Бұл активтердің өмірлік циклін бақылауға, нысандардың өзекті фотосуреттері мен географиялық координаттарын тіркеуге және болашақта ғарыштық мониторинг деректерін пайдалануға мүмкіндік береді.
Жол картасы, мерзімдер және автоматтандыру көрсеткіштері
Жүйені енгізу 2029 жылға дейінгі жол картасы бойынша жүзеге асырылады. Баланс ұстаушының цифрлы бейіні кезең-кезеңмен енгізіледі: 2026 жылы ғимараттар мен құрылыстар, 2027 жылы жер учаскелері, ал 2028–2029 жылдары көлік, жабдықтар және басқа да активтер базасы қосылады.
Мемлекеттік мүлік және жекешелендіру комитетінің 79 функциясының 36-сы цифрландыруға әлеуеті зор. Қазір оның 26-сы, яғни 72 пайызы автоматтандырылған; III тоқсанда тағы 8 функцияны енгізу жоспарланып отыр. Солардың қатарында акционерлік қоғамдар мен серіктестіктерде электронды дауыс беру және мемлекеттік кәсіпорындардың жарғылары мен баланстарын бекіту бар.
Технологиялар және күтілетін нәтижелер
Келесі кезеңде жүйеге жасанды интеллект және Big Data енгізіледі. Бұл технологиялар нысандардың тозуын болжауға, мүлікті тиімсіз пайдалану белгілерін анықтауға және күтіп-ұстау шығындарын дәл жоспарлауға мүмкіндік береді.
Сонымен бірге «бұлтты» бухгалтерия енгізу, e-Qazyna-ны «е-Қаржымині» жүйесімен интеграциялау және квазимемлекеттік сектор субъектілерінің ішкі корпоративті есепке алуын автоматтандыру көзделген. Ұлттық және стратегиялық ресурстар — жер, су, орман қоры, жерасты сулары, көмірсутек пен қатты пайдалы қазбалар туралы мәліметтер Мемлекеттік тізімнің бірыңғай цифрлы базасында автоматты түрде есепке алынады.
Дереккөз: gov.kz
