BaiQymyz-2026: «Қазанатта» 1 тонна шұбат пен 200 литр қымыз ұсынылды
11–12 шілде күндері Астананың «Қазанат» ипподромында өткізіліп жатқан BaiQymyz-2026 халықаралық гастрофестивалінде қонақтар қымыз бен шұбаттың дәмін тата алады. Өндірушілер фестивальге барлығы 1 тонна шұбат пен 200 литр қымыз жеткізді. Бұл туралы елорда әкімдігінің ресми сайты хабарлады.
«Сыр дәмі» брендінің иесі Дамир Әбілда өз шаруашылығының негізгі бағыты шұбат өндіру екенін атап өтті. Оның сөзіне қарағанда, қазіргі уақытта қолдарындағы жылқының 350 басы ет өндіруге арналған, ал сүт бағытын дамыту жұмыстары енді басталып келеді. Кәсіпкердің пікірінше, осындай фестивальдер ұлттық сусындарды кеңінен насихаттауға және халықтың дәстүрлі өнімдерді тұтыну мәдениетін қалыптастыруға елеулі үлес қосады.
Фестиваль бағдарламасы ауқымды мазмұнмен толтырылған: ұлттық тағамдардың көрмесі, мәдени және спорттық шаралар, ат спорты көрсетілімдері, отбасылық алаңдар, сондай-ақ белгілі өнерпаздардың концерттері ұйымдастырылған.
