Астанада Astana Pop Up Store дизайн-фестивалі ашылды: 50-ден астам бренд қатысады
Астанадағы Бейбітшілік және келісім сарайында Astana Pop Up Store атты алғашқы жергілікті дизайн-фестивалі басталды. Бұл шара Креативті индустрияларды дамыту қоры мен MOST Holding арасында жасалған ынтымақтастық меморандумы шеңберіндегі алғашқы бірлескен жобалардың бірі болып табылады. Бұл туралы елорда әкімдігінің ресми сайты хабарлады.
Екі күнге созылатын фестивальде Қазақстанның барлық өңірінен келген 50-ден астам жергілікті бренд өз өнімдерін таныстырады. Авторлық киім-кешек, аксессуарлар, зергерлік бұйымдар, интерьер заттары, косметика және үй тауарлары — барлығын орнында сатып алуға болады. Сонымен қатар, келушілерге бай мәдени бағдарлама ұсынылған: Moldanazar, Asiya, Torearyq, Yez және Oeleye топтарының концерттері, диджейлік музыкалық сеттер, гастрономиялық аймақ, серіктестердің арнайы жобалары, ұтыс ойындары мен интерактивті іс-шаралар өтеді.
Astana Pop Up Store жобасының басты мақсаты — отандық брендтерді қолдау, креативті кәсіпкерлікті өрістету және қазақстандық шығармашылық өнімдерді насихаттау. Жоба дизайнерлер мен кәсіпкерлерге өнімдерін кең аудиторияға таныстыруға, іскерлік байланыстарын нығайтуға және жаңа серіктестіктер орнатуға мүмкіндік береді. Фестиваль 11-12 шілде күндері сағат 12:00-ден 20:00-ге дейін жұмыс істейді.
