Қазақстан мен АҚШ көлік және логистика саласындағы әріптестікті кеңейтеді

Қазақстан–АҚШ бизнес-форумы Вашингтонда өтті

Вашингтонда B20 саммиті аясында Қазақстан мен АҚШ арасындағы бизнес-форум ұйымдастырылды. Іс-шараға Қазақстан тарапынан Президенттің АҚШ-пен өзара іс-қимыл жөніндегі арнайы өкілі Ержан Қазыхан, Премьер-министрдің орынбасары – Көлік министрі Әсел Жанасова, Ұлттық банк төрағасы Тимур Сүлейменов, «Атамекен» Ұлттық кәсіпкерлер палатасының төрағасы Қанат Шарлапаев және мемлекеттік органдар мен ұлттық, жеке компаниялардың өкілдері қатысты.

АҚШ-тан Мемлекеттік хатшының бірінші орынбасары Кристофер Ландау, АҚШ Сауда палатасының президенті Сюзанн Кларк, Қазақстан-Америка іскерлік кеңесінің мүшелері және 100-ден астам америкалық компанияның өкілдері келді. Бұл компаниялар көлік-логистика, энергетика, өнеркәсіп, ауыл шаруашылығы, цифрлық технологиялар мен қаржы салаларында жұмыс істейді.

Көлік-логистика және инвестициялық ынтымақтастық

Форумда тараптар инвестициялық ынтымақтастықты кеңейту, бірлескен жобаларды іске асыру және көлік-логистика, энергетика мен цифрлық технологияларды дамыту мәселелерін талқылады. Әсел Жанасова АҚШ Әкімшілігі мен Конгресінің өкілдері және жетекші қаржы ұйымдарымен екіжақты кездесулер өткізді.

Кездесулерде Қазақстанның Еуразиядағы ірі логистикалық орталыққа айналу мақсаты сөз болды. Мемлекет басшысы осы бағытта нақты міндеттер қойған. Халықаралық көлік дәліздерін дамыту, логистикалық инфрақұрылымды жаңғырту, америкалық инвестициялар мен жаңа технологияларды тарту негізгі басымдықтардың бірі саналады.

Бірлескен жобаларды іске асыруға қызығушылық

Қазақстан америкалық серіктестерімен көлік-логистика саласындағы өзара тиімді ынтымақтастықты дамытып, бірлескен жобаларды жүзеге асыруға ниетті екенін атап өтті.

Дереккөз: gov.kz