Президент Жолдауы: ғылым мен жасанды интеллект ел дамуының жаңа басымдығы аталды
Президент Қасым-Жомарт Тоқаев «Жаңа тарихи кезеңдегі Қазақстанның өзекті міндеттері» атты Жолдауында ел дамуының жаңа бағыттарын айқындап, білім, ғылым, инновация мен адами капиталдың елдің бәсекеге қабілеттілігін арттырудағы маңызын атап өтті. Мемлекет басшысы тәуелсіздіктің 35 жылдығы және жаңа Конституцияның қабылдануы ел дамуы мен саяси жүйені жаңғыртудағы маңызды кезеңдер екенін айтты.
Жалпыхалықтық құрылыс және жаңа инфрақұрылым
Президент 2025 жылды «Жалпыхалықтық ауқымды құрылыс жылы» деп жариялауды ұсынды. Бұл бастама заманауи инфрақұрылым қалыптастырып, экономиканы дамытуға және жаңа технологиялық дәуір талаптарына жауап беретін қоғам құруға бағытталған. Жолдауда инфрақұрылымдық өзгерістермен қатар, ел болашағына ұзақ мерзімді инвестиция салу, ғылыми әлеуетті арттыру мен білікті кадрлар даярлау қажеттігі айтылды.
Ұлттық қор және адами капиталды дамыту
Жолдауда Ұлттық қордың негізгі міндеті ел байлығын сақтап, оны қазіргі және келесі ұрпақтың игілігіне жұмсау екені баса көрсетілді. Президент болашаққа қаржылық жинақпен қатар, технологиялық дамуы жоғары, бәсекеге қабілетті экономика мен заманауи инфрақұрылымы бар ел қалдыру қажеттігін айтты. Осы мақсатта білім мен ғылымды дамыту, еңбек нарығына қажет мамандар даярлау және ғылыми жаңалықтарды өндіріске енгізу маңызды екені атап өтілді.
Ғылым мен білімді интеграциялау
Мемлекет басшысы мемлекеттік органдар арасындағы өзара іс-қимылды күшейту, өңірлердің дамуын үйлестіру және экономикаға қажетті білім, қолданбалы ғылым, логистика, қызмет көрсету мен технологиялық кәсіпкерлікті біріктіретін экожүйелер құру қажеттігін айтты. Мұндай тәсіл университеттер мен ғылыми ұйымдардың әлеуетін арттырып, білім беру бағдарламаларын нарық сұранысымен үйлестіруге мүмкіндік береді.
Жасанды интеллект және цифрлық экономика
Президент цифрлық экономиканың жаңа моделіне көшу қажеттігін атады. Қазақстанда бұл бағытты дамытуға білімді жастар, интернет және цифрлық инфрақұрылым бар. Ендігі мақсат – цифрлық технологияларды кәсіби даму мен кәсіпкерлікке, жаңа өнімдер жасауға қолдану. Осыған орай жасанды интеллект, жоғары өнімді есептеулер және басқа да технологиялық бағыттарда маман даярлау өзекті болып отыр.
Білім мен ғылым – елдің технологиялық болашағы
Жолдауда көрсетілген басымдықтар елді кешенді дамытуға бағытталғанын айғақтайды. Инфрақұрылымды жаңғырту, ғылыми-технологиялық прогресс және азаматтардың өмір сүру сапасын арттыру өзара байланысты. Жоғары білім жүйесі үшін бұл – мамандар даярлау сапасын арттыру, ғылыми зерттеулерді дамыту және жастардың бастамаларын қолдау. Ғылым және жоғары білім министрлігі адами капиталды дамыту мен инновацияны енгізу жұмыстарын жалғастырады.
Президент Жолдауында білім, ғылым және технологиялар экономикалық өсудің негізгі қозғаушы күшіне айналуы, әрбір азаматтың кәсіби дамуына және өз қабілетін жүзеге асыруына жағдай жасалуы тиіс екені айтылды. Адами капиталға салынған инвестиция Қазақстанның тұрақты дамуы мен технологиялық өркендеуінің негізі болмақ.
Дереккөз: gov.kz
