Қазақстанда 81 психикалық денсаулық орталығы мен 189 аутизмге арналған бөлімше ашылады
Қазақстанда психикалық денсаулық сақтау саласында қызмет көрсету желісін кеңейту жоспарланып отыр. 2027–2031 жылдарға арналған кешенді жоспар жобасы аясында ел бойынша 81 жаңа бастапқы психикалық денсаулық орталығы мен 189 аутизм спектрі бұзылыстары бар балаларға арналған күндізгі бөлімше ашу көзделген. Бұл туралы ҚР Денсаулық сақтау министрлігінің Медициналық көмекті ұйымдастыру департаментінің директоры Гүлнар Сәрсенбаева айтты.
Психикалық денсаулық орталықтарының саны көбейеді
Бүгінде елімізде 20 психикалық денсаулық орталығы, 101 бастапқы орталық және 212 бейінді кабинет жұмыс істейді. Денсаулық сақтау министрлігінің мәліметінше, 12 өңірде қосымша 81 орталық ашу қажеттілігі анықталған. Бұл жаңа нысандар ауыл тұрғындары үшін қызметтердің қолжетімділігін арттыруға мүмкіндік береді.
Аутизмі бар балаларға арналған 189 бөлімше ашу жоспарланып отыр
Аутизм спектрі бұзылыстары бар балаларға ерекше назар бөлініп отыр. Психикалық денсаулық орталықтары мен аудандық ауруханалар базасында 189 күндізгі болу бөлімшесін ашу жоспарланған. Бұл шара балаларды стационарға жатқызбай-ақ оңалту қызметін қолжетімді етуге бағытталған.
Мамандар тапшылығы және әлеуметтік қолдау шаралары
Денсаулық сақтау министрі Ақмарал Әлназарова психикалық денсаулық саласындағы мамандар тапшылығы мәселесіне тоқталды. Министр өңірлерде кадрлық әлеуетті күшейтуді және медицина қызметкерлерін әлеуметтік қолдаудың қосымша шараларын енгізуді тапсырды. Сонымен қатар, жергілікті атқарушы органдардың білім беру гранттары арқылы мамандарды даярлау көлемін ұлғайту қажеттігі айтылды.
Кешенді жоспар аясындағы қосымша шаралар
Жоспарға сәйкес, медициналық ұйымдарды жаңғырту, жабдықтарды жаңарту, амбулаториялық көмекті дамыту және дәрі-дәрмекпен қамтамасыз ету жүйесін жетілдіру қарастырылған. Психикалық денсаулық саласында ерте анықтаудан бастап, емдеу және оңалтуға дейін үздіксіз және қолжетімді көмек көрсету басты мақсат болып отыр.
Дереккөз: gov.kz
