Алматы облысында ауыл шаруашылығы өнімдерін қайта өңдеу және экспорттық әлеует артып келеді
Алматы облысында ауыл шаруашылығы өнімдерін қайта өңдеу мен агроөнеркәсіптік кешенді дамыту бағыттары қарқын алуда. Ауыл шаруашылығы министрлігі ұйымдастырған баспасөз туры барысында журналистерге өңірдегі өндірістік қуаттар, шикізатты терең өңдеу технологиялары, өнеркәсіптік бау-бақша және жылыжай шаруашылығының дамуы, сондай-ақ етті мал шаруашылығының мүмкіндіктері көрсетілді.
Агроөнеркәсіптік кешеннің негізгі бағыттары
Баспасөз туры аясында журналистер астық дақылдарын өңдеу және азық-түлік өнімдерін өндіруден бастап, жеміс-жидек пен көкөніс өсіру, заманауи сақтау жүйелерін ұйымдастыру және қосылған құны жоғары өндірістік тізбектерді құру бағыттарымен танысты. Алматы облысында қайта өңдеу кәсіпорындары, интенсивті бау-бақша шаруашылығы, жылыжай кешендері мен мал шаруашылығы нысандары дамып келеді. Министрліктің мәліметінше, бұл салаға салынған инвестициялар өндіріс көлемін ұлғайтып, жаңа жұмыс орындарын ашуға және елдің азық-түлік қауіпсіздігін қамтамасыз етуге ықпал етеді.
Жаңа өндіріс орындары мен технологиялық жаңғырту
«Fruit Art» ЖШС жеміс-жидек комбинаты жылына 5 мың тоннадан астам шикізатты өңдеуге, 15 мың тоннаға дейін жемісті сақтауға мүмкіндік береді. Кәсіпорын аумағында 5,5 гектар жылыжай кешені бар және 2023 жылы іске қосылған. Жобаға 44 млрд теңге инвестиция салынған.
«Шин-Лайн» ЖШС балмұздақ және сүт өнімдерін өндіреді, 36 брендпен 160-тан астам өнім түрін шығарып, 10 елге экспорттайды. Кәсіпорында өндірістік желілер мен логистикалық инфрақұрылым дамыған.
«АзияАгроФуд» АҚ бидай мен жүгеріні терең өңдеумен айналысады. Өндірістік инфрақұрылымына диірмен кешені, крахмал-сірне өндірісі, құрама жем зауыты, элеватор мен қоймалар кіреді. Бір мезгілде 15,2 мың тонна астық сақтау мүмкіндігі бар, қосымша қоймаларда 40 мың тоннаға дейін өнім сақталады.
Өнеркәсіптік жылыжайлар мен жеміс сақтау
«Green Land Alatau» ЖШС жылыжай кешені 10,5 гектар аумақта орналасқан және жылына 6,8 мың тонна қызанақ, қияр мен салат дақылдарын өсіреді. 2010 жылдан бері жұмыс істейтін «Иссыкский плодоконсервный завод» ЖШС жылына 10 мың тоннаға жуық шикізатты өңдеп, томат пастасы, алма және өрік езбесін шығарады.
Етті мал шаруашылығы мен интенсивті бау-бақша
«Агро Балтабай» ЖШС Қырбалтабай ауылында 4 мың бас аналық және 6 мың бордақылаудағы ірі қараны ұстайтын кешенді дамытып отыр. Шаруашылықтың жеке жемшөп базасы бар.
«Apple Bee» ЖШС өнеркәсіптік алма бағының аумағы 120 гектарды құрайды. Жыл сайын 3 мың тоннаға дейін алма және 300 мың дана элиталық көшет өсіріледі. Кәсіпорын суықтай сығу әдісімен алма шырынын өндіріп, Қазақстан мен Орталық Азия елдеріне жеткізеді. 2020 жылы іске қосылған жобаға 487 млн теңге инвестицияланған.
Агроөнеркәсіптік кешенді қолдау және даму перспективалары
Министрлік ауыл шаруашылығы өнімдерін қайта өңдеу, өндірістік инфрақұрылымды жаңарту, өнімнің бәсекеге қабілеттілігін арттыру және экспорттық әлеуетін кеңейтуге бағытталған жұмысты жалғастырады. Алматы облысының тәжірибесі агроөнеркәсіптік кешенде жаңа технологияларды енгізу және экспортқа бағдарланған өндірісті дамыту мүмкіндіктерін айқындап отыр.
Дереккөз: gov.kz
