Tashenev University студенттері дрондарды программалау курсын ұсынды

Курстың мақсаты және құрылымы

Tashenev University студенттері AI-Sana көрмесінде дрондарды бағдарламалау және басқару бойынша практикалық курсын ұсынды. Жоба студенттерге робототехника, программалау және автономды жүйелерді басқару бағыттарын бір практикалық ортада игеруге мүмкіндік береді.

Курстың негізгі мақсаты – дрондарды пұлт арқылы ұшырумен шектелмей, программалық код көмегімен басқаруды, ұшу алгоритмдерін әзірлеуді және нақты міндеттерді орындауға бейімдеуді үйрету.

Оқу процесі және практикалық тапсырмалар

Оқу барысында студенттер Bitcraze Crazyflie 2.1 шағын дрондарымен жұмыс істейді. Бірінші кезеңде студенттер дронның құрылымымен, ұшу принциптерімен, датчиктердің жұмысымен және компьютермен байланыс орнатумен танысады. Одан кейін Python бағдарламалау тілі арқылы дрондарға командалар береді және автоматтандырылған ұшу алгоритмдерін жасайды.

Практикалық тапсырмалар аясында студенттер дронды іске қосуды, белгіленген биіктікті сақтауды, әртүрлі бағытта қозғалтуды және автоматты түрде қондыруды үйренеді. Кейін дрондардың квадрат, шеңбер және алдын ала белгіленген маршрут бойынша ұшу алгоритмдерін құрастырады.

Топтық ұшу және дрон формациялары

Жобаның негізгі бағыттарының бірі – бірнеше дронды бір мезгілде басқару және олардың синхронды қозғалысын қамтамасыз ету болып табылады.

Қазіргі уақытта университетте 10 Crazyflie дроны бар. Жобаның келесі кезеңінде оларды біртұтас басқару жүйесіне біріктіріп, қозғалысын үйлестіру көзделген. Бұл бірнеше дронды қатар ұшыруға, оларды белгілі бір формацияға орналастыруға және ұшу барысында формацияны өзгертуге мүмкіндік береді.

Компьютерлік көру технологиялары

Жобаны дамыту аясында компьютерлік көру технологияларын енгізу жоспарланып отыр. Ол үшін дрондарға арнайы визуалды маркерлер орнатылып, жоғарыда орналасқан камера арқылы олардың кеңістіктегі X және Y координаттары анықталады.

Осы деректер негізінде компьютер дрондардың нақты орналасуын бақылап, олардың белгіленген позициядан ауытқуын анықтайды және қозғалысын автоматты түрде түзетеді. Камера дрондардың орналасуын сырттан анықтайтын жүйе қызметін атқарып, олардың қозғалысының дәлдігін арттырады.

Келесі кезеңдер және қолданысы

Алдағы уақытта жоба аясында автоматтандырылған ұшу маршруттарын әзірлеу, топтық формацияларды басқару және дрондардың синхронды қозғалысын қамтамасыз ету жоспарланған. Сондай-ақ компьютерлік көру мен жасанды интеллект элементтерін қолдану мүмкіндіктері қарастырылады.

Әзірлемені дрон-шоулар ұйымдастырумен қатар аумақтарды бақылау, іздеу-құтқару жұмыстарына қолдау көрсету, нысандарды анықтау және автономды роботтық жүйелерді сынақтан өткізу сияқты салаларда қолдануға болады.

Курстың ерекшелігі

Курстың басты ерекшелігі – студенттердің дайын технологияны пайдаланумен шектелмей, оның жұмыс істеу принциптерін түсінуі, өз алгоритмдерін әзірлеуі және оларды нақты құрылғыларда сынақтан өткізуі. Бұл тәсіл программалау, робототехника, компьютерлік көру және автономды жүйелерді басқару бойынша практикалық дағдыларды кешенді түрде қалыптастыруға бағытталған.