Терезеден құлау: елордалық дәрігер ата-аналарға маңызды ескерту жасады
Жыл сайын жаз айлары мен мектеп демалысы кезінде балалардың терезеден құлау оқиғалары жиілейді. Астана әкімдігінің мәліметінше, елорда дәрігерлері ата-аналарға бұл маусымдық қауіп туралы үнемі ескертіп отырады. Мамандардың пікірінше, мұндай жағдайлардың басым бөлігін алдын ала болғызбауға болады — қайғыға жеткізу үшін ересектің бір минутқа алаңдауы жеткілікті.
Зардап шегушілердің көпшілігі бір жастан алты жасқа дейінгі балалар. Олар терезе алдына оңай шыға алады, бірақ биіктіктің қаншалықты қауіпті екенін толық түсінбейді. Дәрігерлер ата-аналар арасында кеңінен таралған қате түсінікке — москит торының қорғаныш қызметін атқарады деген пікірге — ерекше назар аударды. Шындығында, москит торы баланың салмағына төтеп бере алмайды және аз ғана қысыммен баламен бірге құлайды. Тіпті аз биіктіктен түсудің өзі бас-ми жарақатына, омыртқа мен аяқ-қол сүйектерінің сынуына, ішкі ағзалардың зақымдануына себеп болуы мүмкін. Мұндай жарақаттар көбіне күрделі хирургиялық операция мен ұзақ оңалту кезеңін қажет етеді.
Астанада балалардың қауіпсіздігін қамтамасыз ету мақсатында медициналық мекемелер, Төтенше жағдайлар департаменті, полиция және білім беру ұйымдары бірлесе жұмыс жүргізеді. Профилактикалық рейдтер мен үй-үйді аралау кезінде мамандар ата-аналарға жадынамалар таратып, балабақшаларда, емханаларда және тұрғын үй кешендерінде түсіндіру жұмыстарын жүргізеді. Дәрігерлер ата-аналарды бүгін-ақ терезелерге ашылуды шектейтін қауіпсіздік бекіткіштері мен балаларға арналған құлыптар орнатуға, терезе алдындағы жиһазды алып тастауға шақырады. «Осындай қарапайым шаралар баланың өмірін сақтап қалуы мүмкін», — деп атап өтті маман. Балалар қауіпсіздігі ең алдымен ересектердің жауапкершілігі мен үздіксіз қырағылығынан басталады.
