Қарағандыда IT-білім беру жасанды интеллект заманына бейімделуде
Қарағанды техникалық университетінде «AI-native трансформация: технологиялар мен жаңа құзыреттер» атты республикалық ғылыми-әдістемелік семинар өтті. Іс-шараны «Ақпараттық-коммуникациялық технологиялар» және «Ақпараттық қауіпсіздік» бағыттары бойынша Республикалық оқу-әдістемелік кеңестің Оқу-әдістемелік бірлестігі ұйымдастырды. Жиынға мемлекеттік органдар, жоғары оқу орындары, IT-компаниялар мен өнеркәсіп кәсіпорындарының өкілдері қатысты.
Семинар бағдарламасы мен негізгі баяндамалар
Семинарда Қазақстан Республикасы Ғылым және жоғары білім министрлігі Жоғары және жоғары оқу орнынан кейінгі білім комитетінің төрағасы Ержан Әмірбекұлы және Қарағанды техникалық университетінің ректоры Сәуле Сагинтаева құттықтау сөз сөйледі. Бағдарламаға пленарлық отырыс, сарапшылық сессия және үш тақырыптық секция кірді. Qazaq AI Research University ректоры Сапар Токсанов жоғары білімнің жасанды интеллект дәуіріндегі жаңа міндеттері жөнінде баяндама жасады. ҚР Қаржылық мониторинг агенттігінің өкілі Меруерт Саттыбаева экономикалық тергеп-тексеру саласына арналған Minor бағдарламасын таныстырды.
IT-білім беруді жаңарту және еңбек нарығы талаптары
«IT-білім беру 2027-2030: жаңа құзыреттер және білім беру бағдарламаларын трансформациялау» атты сарапшылық сессияға SAP, ERP, KZ-CERT, Astana Hub, Qarmet және Қазақстандық киберқауіпсіздік қауымдастығының мамандары қатысты. Талқылауда еңбек нарығының заманауи талаптары, оқу бағдарламаларын жаңарту және студенттердің тәжірибелік дағдыларын дамыту мәселелері көтерілді.
Жасанды интеллектіні өндірісте қолдану және жаңа жобалар
Семинар үш бағытта жалғасты: зияткерлік корпоративтік жүйелер мен AI-агенттер, өндірістегі жасанды интеллект, және AI-native жүйелердің киберқауіпсіздігі. Әр секцияда жасанды интеллектіні кәсіпорындарда пайдалану, бизнес-процестерді автоматтандыру, робототехника мен ақпараттық қауіпсіздік тақырыптары сөз болды. Сонымен қатар, Қарағанды жоғары оқу орындарының жасанды интеллект саласындағы инновациялық жобалары көрсетілді. Қарағанды индустриялық университеті AI Syllabus, SolarAI және KarIU Smart Bots жобаларын ұсынды.
IT-білім берудің болашағы бойынша ұсыныстар
Семинар қорытындысында қатысушылар 2027-2030 жылдарға арналған IT саласындағы білім беру бағдарламаларын жаңарту, жаңа пәндер мен модульдер енгізу және жоғары оқу орындарының өндірістік серіктестермен ынтымақтастығын кеңейту жөніндегі ұсыныстарды қарастырды.
Дереккөз: gov.kz
