Нобель сыйлығы лауреатының тобының мүшесі Қазақ агротехникалық университетінің құрметті профессоры атанды
Мажарстанның топырақтану, агроэкология және климаттық зерттеулер саласының маманы Йожеф Жембелге Сәкен Сейфуллин атындағы Қазақ агротехникалық зерттеу университетінің құрметті профессоры атағы берілді. Ол – Нобель сыйлығы лауреаты атанған климаттың өзгеруі жөніндегі үкіметаралық сарапшылар тобының мүшесі.
Йожеф Жембелдің ғылыми қызметі мен халықаралық серіктестік
Йожеф Жембел Мажарстанның Ауыл шаруашылығы және өмір туралы ғылымдар университетінің атынан өкілдік етеді және Қазақ агротехникалық зерттеу университетінде сеньор-лектор қызметін атқарады. Ол халықаралық академиялық ынтымақтастықты дамытуға, ғылыми тәжірибе алмасуға және Қазақстанның аграрлық саласына қажетті мамандарды даярлауға үлес қосып келеді.
Ғалым Мажарстанның Карцаг қаласындағы Климаттық зерттеулер институтын басқарады. Оның негізгі ғылыми бағыттары – топырақтағы көміртек айналымын зерттеу, ауыл шаруашылығындағы парниктік газдар шығарылымы мен сіңірілуін бағалау, аграрлық өндірісті климаттың өзгеруіне бейімдеу және құрғақшылықтың әсерін азайту әдістерін әзірлеу.
Нобель сыйлығы және конференция аясындағы марапат
Йожеф Жембел Климаттың өзгеруі жөніндегі үкіметаралық сарапшылар тобының ғылыми жұмысына қатысып, 2007 жылы бұл топ Бейбітшілік саласындағы Нобель сыйлығын иеленген. Оның көміртекті егіншілік саласындағы зерттеулері топырақ ресурстарын сақтау мен ауыл шаруашылығындағы климаттық тәуекелдерді азайтуға бағытталған.
Құрметті профессор атағы «Ауыл шаруашылығы және климатты қорғау» тақырыбындағы II халықаралық конференция барысында табысталды. Жиынға Қазақстан мен Мажарстанның ғалымдары мен сарапшылары қатысты.
Конференцияның басты тақырыптары
Конференцияда тұрақты егіншілік әдістерін енгізу, топырақ құнарлылығын арттыру, су ресурстарын тиімді пайдалану және көміртек несиесі нарығын дамыту мәселелері талқыланды. Мажарстанның International Climate Change Solutions (ICCS) компаниясы Қазақстанда климатқа бағдарланған агротехнологияларды енгізу және аграрлық сектордың инвестициялық мүмкіндіктерін кеңейту бағытындағы бастамаларға қолдау көрсетеді.
Қазақ агротехникалық университетінің халықаралық байланыстары
Сәкен Сейфуллин атындағы Қазақ агротехникалық зерттеу университеті халықаралық серіктестікті дамытып, шетелдік жоғары оқу орындары мен ғылыми-зерттеу орталықтарымен байланысын нығайту арқылы ауыл шаруашылығы саласына инновацияларды енгізуді жалғастырып келеді.
Дереккөз: gov.kz
