Ақмола облысында полицейлер ауыр хәлдегі жасөспірімді дер кезінде ауруханаға жеткізді
Ақмола облысында патрульдік полиция қызметкерлері шұғыл медициналық көмек қажет болған 15 жастағы жасөспірімді уақытында ауруханаға жеткізуге қолдау көрсетті. Оқиға Щучинск қаласында орын алды.
Жергілікті тұрғын әкімшілік полиция инспекторы Азамат Албақовқа хабарласып, баласының жағдайы нашарлағанын жеткізіп, көмек сұраған. Ол жасөспірімге Көкшетаудағы облыстық балалар ауруханасының дәрігерлері жедел түрде көмек көрсетуі қажет екенін айтқан.
Баланы уақытында жеткізуге алаңдаған әйел полицияға жүгінген. Азамат Албақов оқиғаның шұғыл екенін ескеріп, жақын маңдағы патрульдік экипажды көмекке бағыттады.
Полиция жасөспірімге қалай көмектесті
Патрульдік полиция қызметкерлері Медет Кабиев пен Жақсылық Байдуллин шұғыл шақыртуға дереу әрекет етіп, жасөспірім отырған көлікті қарсы алды. Тәртіп сақшылары қызметтік көліктің арнайы жарық сигналдарын қосып, Щучинск қаласынан Көкшетау қаласына дейін 70 шақырымға жуық жолда баланың көлігін бастап жүрді.
Осының арқасында науқас жасөспірім облыстық балалар ауруханасына барынша қысқа уақытта жеткізілді. Қиын сәтте көмек көрсеткен полицейлерге Щучинск тұрғыны алғыс айтты.
Жергілікті тұрғын полицияға ризашылығын білдірді
Оқиғаға байланысты әйел осындай шұғыл жағдайда тез әрекет етіп, қолдау көрсеткен тәртіп сақшыларына шынайы алғысын жеткізді. Ол полиция қызметкерлерінің жанашырлығы мен жауапкершілігі үлкен құрметке лайық екенін атап өтті.
Дереккөз: gov.kz
