Kraken криптоплатформасы Қазақстан нарығына ресми түрде кіре бастады
Kraken Қазақстандағы цифрлық активтер нарығына шығуға рұқсат алды
AI & Digital Bridge 2026 халықаралық форумы аясында Қазақстан Премьер-министрі Олжас Бектенов пен Kraken криптоплатформасының тең бас атқарушы директоры Дэвид Рипли кездесті. Жиында тараптар цифрлық активтер нарығын дамыту, жаңа қаржылық технологияларды енгізу және халықаралық тәжірибені қолдану мәселелерін талқылады.
Ынтымақтастық туралы меморандумға қол қойылды
Кездесу қорытындысында Қазақстанның Жасанды интеллект және цифрлық даму министрлігі мен Kraken компаниясы арасында ынтымақтастық туралы меморандум рәсімделді. Құжат цифрлық активтерді реттеу, қаржы нарығын дамыту, банк инфрақұрылымын интеграциялау, блокчейн-технологияларды енгізу және халықтың қаржылық сауаттылығын арттыруға бағытталған өзара іс-қимылды көздейді.
Kraken АХҚО-дан алдын ала мақұлдау алды
Kraken компаниясы Астана халықаралық қаржы орталығының қаржылық қызметтерді реттеу комитетінен (AFSA) алдын ала мақұлдау құжатын алды. Бұл лицензиялау үдерісінің негізгі кезеңдерінің бірі саналады. Алдағы уақытта талаптар толық орындалса, компания АХҚО-ның реттелетін юрисдикциясында ресми қызметін бастай алады.
Қазақстан криптоиндустриядағы жетекші орталыққа айналуда
Цифрлық даму министрлігінің мәліметінше, Kraken-нің Қазақстан нарығына келуі елдің өңірлік криптохаб ретіндегі мәртебесін нығайтады. Вице-министр Ғиззат Байтурсынов бұл қадам халықаралық тәжірибе алмасуға және блокчейн-технологияларды дамытуға мүмкіндік беретінін атап өтті. Ал Kraken-нің басшысы Дэвид Рипли компания Қазақстан нарығына шығуға дайын екенін және мемлекеттік органдармен ынтымақтастыққа сенім артатынын жеткізді.
Kraken туралы қысқаша мәлімет
Kraken – 2011 жылы АҚШ-та құрылған ірі халықаралық криптоплатформа. Компания жеке және заңды тұлғаларға цифрлық активтерді сатып алу, сату, сақтау және саудалау қызметтерін ұсынады. Платформа Солтүстік Америка, Еуропа және басқа өңірлерде кеңінен жұмыс істейді, түрлі цифрлық және фиаттық валюталарды қолдайды және кәсіби сауда қызметтерін көрсетеді.
Дереккөз: gov.kz
