Азық-түлік бағасының өсуі бәсеңдеді: Қазақстанда екі ай қатарынан төмендеу байқалды

Қазақстанда екі ай бойы азық-түлік бағасының төмендеуі тіркелді. Бұл туралы Үкіметте өткен кеңесте Премьер-министрдің орынбасары, Ұлттық экономика министрі Серік Жұманғарин мәлімдеді. Кеңесте инфляция деңгейі мен бағаны тұрақтандыру тетіктері талқыланды.

Негізгі азық-түлік тауарларының бағасы не себепті төмендеді

Сауда және интеграция министрлігінің мәліметіне сәйкес, азық-түлік инфляциясы екі ай қатарынан төмендеп, дефляция 0,1% деңгейінде сақталуда. Бұл үрдіске әлеуметтік маңызы бар өнімдердің бағасының баяу өсуі әсер етті. Биыл осы тауарлар бағасы 1,8%-ға ғана өсті, былтыр дәл осы кезеңде өсім 8,3% болған. Яғни, биыл баға өсімі 4,6 есе баяулады.

Бағасы арзандаған және қымбаттаған өнімдер

Өткен аптада қант 2,4%-ға, пияз 1,7%-ға, алма мен сәбіз 0,9%-ға, күріш 0,5%-ға, қой еті 0,4%-ға арзандады. Ал нан, макарон, сары май, тұз және шай бағасы өзгерген жоқ. Алайда, күннің суытуына байланысты қияр 4,6%-ға, қырыққабат пен қызанақ 3,7%-ға, картоп 2,4%-ға қымбаттады. Көкөністердің бағасын тұрақтандыру үшін жылыжай өнімдерін өндірушілермен меморандум жасалады.

Бағаны тұрақтандыру шаралары мен жеңілдіктер

Бағаны тұрақтандыру мақсатында ауыл шаруашылығы жәрмеңкелері ұйымдастырылуда. Бұл жәрмеңкелерде өндірушілер өз өнімдерін тұтынушыларға тікелей ұсынады. 17–27 қазан аралығында ел бойынша «Bereke Fest» және «Republic Day» акциялары өтуде. Оған 649 сауда нысаны қатысып, тұрғындарға күнделікті тұтынатын азық-түліктер 50%-ға дейін жеңілдікпен ұсынылады.

Өңірлерге қойылған тапсырмалар

Кеңес барысында Серік Жұманғарин азық-түлік инфляциясы байқалған облыстардың әкімдіктерін тыңдады. Ол барлық өңірге ауыл шаруашылығы жәрмеңкелерінің санын көбейтіп, халыққа аса қажет азық-түлік өнімдерін қолжетімді әрі жеткілікті көлемде ұсынуды тапсырды.

Дереккөз: gov.kz