Қант диабетінің ауыр асқынуында аяқ аман қалсын: хирург Тимур Екібаевтың тәжірибесі
Республика күні қарсаңында Кардиология және ішкі аурулар ғылыми-зерттеу институтының Республикалық эндокринология және диабет орталығының хирург-подологы Тимур Екібаевтың қызметі туралы айтамыз. Қант диабеті асқынғанда науқасқа аяқ ампутациясы қаупі төнеді. Мұндай жағдайда дәрігердің басты мақсаты – асқынудың алдын алып қана қоймай, аяқтың қызметін сақтап, науқастың қалыпты өмірге оралуына көмектесу.
Диабеттік табан және ауыр жараларды емдеу жолдары
Тимур Екібаев диабеттік табан синдромын, терең трофикалық жараларды, диабеттік гангрена мен іріңді-некроздық зақымдануларды, сондай-ақ табан сүйегі мен буындарының бұзылуын емдеуге маманданған. Ол ұзақ уақыт жазылмайтын жарасы бар науқастарға ерекше көңіл бөледі. Көбінесе мұндай адамдар ұзақ емделгенімен, нәтиже болмаған соң маман көмегіне жүгінеді.
Бұл жағдайда зақымданған тіндерді алып тастап, инфекцияны бақылауда ұстау, сондай-ақ жараның жазылуына қолайлы жағдай жасап, сау тіндерді барынша сақтау маңызды. Дәрігер емдеуде осы қағиданы ұстанады.
Шарко нейроостеоартропатиясы және заманауи әдістер
Екібаевтың тағы бір маманданған бағыты – Шарконың диабеттік нейроостеоартропатиясы. Бұл сырқатта табан сүйектері мен буындары зақымданып, деформациялар мен ойық жаралар пайда болады. Мұндай жағдайда аяқтың зақымданған тұсына түсетін салмақты азайту үшін иммобилизация әдісі, соның ішінде Total Contact Cast деп аталатын арнайы гипс қолданады. Бұл технология салмақты біркелкі таратып, тіндердің жазылуына көмектеседі.
Аяқты ампутациядан сақтау тәсілдері
Ең күрделі жағдайларда, гангрена дамығанда, дәрігер ағза мен тіндерді барынша сақтауға тырысады. Ол тіршілікке қабілетсіз тіндерді алып тастап, инфекцияны бақылауда ұстайды және сау құрылымдарды мүмкіндігінше сақтап қалуға күш салады.
Кәсіби жолы және біліктілікті арттыру
Тимур Екібаев Қазақ-Ресей медицина университетінде білім алды. Ол доктор Рүстем Нұралиннен подиатрия бойынша оқудан өткен. Кәсіби тәжірибесін «Диабеттік табан» орталығында және Есік қалалық ауруханасында жинады. Кейін Мәскеудегі Эндокринология ұлттық медициналық зерттеу орталығында тағылымдамадан өтіп, мамандар тәжірибесін меңгерді. Испаниялық профессор Миньоранстың жетекшілігімен созылмалы жараларды емдеудің заманауи әдістерін оқыды.
Диабеттік аяқтың асқынуын алдын алу және кешенді көмек
Бүгінде Тимур Екібаевтың басты мақсаты – қант диабетінің ауыр асқынуы бар пациенттерге кешенді әрі тиімді медициналық көмек көрсету. Сонымен қатар, диабеттік табан синдромының алдын алу мен жаңа емдеу тәсілдерін енгізуге мән береді.
Әрбір аман қалған аяқ – адамның өздігінен қозғалуына, жұмыс істеуіне, отбасында болуына және тәуелсіздігін сақтауға мүмкіндік береді. Уақтылы әрі кәсіби ем-дом науқастың өмір сапасын жақсартуға көмектеседі.
Дереккөз: gov.kz
