Астанада ИКАО Бас хатшысының қатысуымен авиация мамандарын даярлау талқыланды
Астанада өтіп жатқан ИКАО-ның 2026 жылғы Авиациялық қауіпсіздік апталығы аясында авиация саласының жаңа буын мамандарын даярлау және кадрлық әлеуетті дамыту тақырыбына арналған арнайы сессия ұйымдастырылды. Оған ИКАО Бас хатшысы Хуан Карлос Саласар, Қазақстан Көлік вице-министрі Талғат Ластаев және авиация қауіпсіздігі саласындағы халықаралық және отандық сарапшылар қатысты.
Авиациялық қауіпсіздік пен кадр тапшылығы мәселелері
Сессияда ИКАО-ның мамандар даярлау жөніндегі жаңа стратегиясы, кадр тапшылығын еңсеру жолдары және қазіргі сын-қатерлер жағдайында саланың тұрақты кәсіби әлеуетін қалыптастыру мәселелері талқыланды. Қатысушылар авиация саласындағы кадр ресурстарын стратегиялық жоспарлау, құзыреттілікке негізделген оқыту және жастар үшін саланың тартымдылығын арттыру тетіктерін қарастырды.
ИКАО Бас хатшысы жастарды авиация саласының болашағын қалыптастыруға тартудың маңызын атап өтті. Оның айтуынша, жас мамандардың көзқарасы мен ұсыныстары халықаралық деңгейде ескерілуі тиіс. Бұл бағытта ұрпақтар арасындағы ашық диалог пен тәжірибе алмасу маңызды екені айтылды.
Мамандарды даярлау мен кәсіби өсу мүмкіндіктері
Астана халықаралық әуежайының қызметкерлері Валерия Харламова мен Олжас Қуаныш кәсіби құзыреттер мен халықаралық тәжірибе алмасудың маңызын бөлісті. Олар авиация саласы үздіксіз даму мен жаңа міндеттер арқылы жастарға өзін-өзі көрсетуге мүмкіндік беретінін айтты. Мамандарды тарту үшін тәлімгерлік, мансаптық өсу мен кәсіби ұтқырлық жүйесін дамыту қажеттігі атап өтілді.
Кабо-Верде Азаматтық авиация басқармасынан Анисио Алмейда білікті кадрларды сақтап қалу мен мамандарға нақты мансаптық перспективалар ұсыну қажеттігін айтты. ИКАО өкілдері авиация саласында кәсіби ұтқырлықты дамыту, қосымша даярлықтан өту және жаңа бағыттарды меңгеру мүмкіндіктерін қарастыруды ұсынды.
Халықаралық ынтымақтастық пен Қазақстанның тәжірибесі
ИКАО-ның Еуропалық және Солтүстік Атлантикалық бюросының өңірлік директоры Николас Ралло халықаралық ынтымақтастық пен мемлекеттерге қолдау көрсетудің маңызын атап өтті. Оның айтуынша, Қазақстан азаматтық авиацияны дамытудың нақты стратегиялық көзқарасын ұстанып отыр және ИКАО-ның 56 елді қамтитын EUR/NAT бюросының серіктесі саналады. Бірлескен жұмыс кадрлық әлеуетті нығайту мен киберқауіпсіздік сияқты жаңа бағыттар бойынша құзыреттерді дамытуға бағытталған.
Кадрлық әлеуетті дамыту – тұрақты авиацияның негізі
Қазақстан Көлік вице-министрі Талғат Ластаев саладағы адами капиталды дамытудың маңызын атап өтті. Оның айтуынша, бүгінде отандық авиацияда 23 мыңнан астам адам еңбек етеді, оның ішінде 3 500-ден астамы – авиациялық қауіпсіздік мамандары. Олардың кәсібилігі мен біліктілігі саладағы қауіпсіздіктің жоғары деңгейін қамтамасыз етеді.
Сессия қорытындысында қатысушылар авиациялық қауіпсіздік пен саланың болашағы заманауи технологияларды енгізу мен халықаралық стандарттарды жетілдіруге ғана емес, білікті мамандарды тарту мен кадрлық әлеуетті дамытуға да байланысты екенін атап өтті. Жас мамандарды даярлау мен кәсіби сабақтастықты қамтамасыз ету орнықты әрі қауіпсіз авиация жүйесін қалыптастырудың негізгі факторы ретінде белгіленді.
Дереккөз: gov.kz
