2026 жылғы туристік маусым қарсаңында, Түркияның терең тарихы мен қазіргі заман мәдениетін тоғыстырған Стамбұл мегаполисі әлемдік саяхат тізімдерінде қайтадан алдыңғы қатарға шықты.
Бұл жылы қала бірқатар ықпалды жаһандық сараптамалардағы өз позициясын нығайтты. Атап айтқанда, «Саяхатқа арналған 50 таңдаулы орын», «Еуропадағы демалысқа ең қолайлы 5 қала» және «Отбасылық демалысқа арналған үздік шаһарлар» секілді рейтингтерде Стамбұл жетекші орындарды иеленді.
Ең соңғы марапат – Лондонда өткен Wanderlust Reader Travel Awards 2025 шарасынан келді. Оқырмандар дауысымен анықталған бұл беделді байқауда Ыстанбұл «Еуропаның ең қалаулы қаласы» (Most Desirable City – Europe) атағын жеңіп алып, Алтын жүлдеге ие болды.
Дауыс беруге қатысқан саяхатшылар Ыстанбұлды: «Әр барған сайын тың әсер сыйлайтын, жан-жақты және үнемі жанданып тұратын мегаполис» деп сипаттаған. Туристік тартымдылығы артып келе жатқан бұл шаһар 2026 жылы да саяхатшылардың назарынан тыс қалмайтыны сөзсіз.
Тарих, Сәулет және Мәдениет Тоғысы
Еуропа мен Азияны жалғаған ерекше географиялық орналасуы, терең тарихы және қарқынды урбанистік өмірі Ыстанбұлға қайталанбас атмосфера береді. Мұнда әр турист өзіне ұнайтын бір әлем таба алады.
Қаланың символына айналған Айя-София, Көк мешіт, Қыз мұнарасы, Галата мұнарасы және Базиликалық цистерна (Yerebatan Sarnıcı) сынды орындар Ыстанбұлдың бай мәдени мұрасын сезінуге мүмкіндік береді. Ал Мысыр базары мен әйгілі Капалы Чаршы (Grand Bazaar) сынды тарихи сауда орындары ғасырлар тереңіне жетелейді. Сонымен қатар, заманауи сауда орталықтары мен дизайнерлік дүкендер Ыстанбұлдың сән мен стиль орталығына айналғанын көрсетеді.
Таксим, Бейоғлу, Қаракөй, Кадикөй, Мода және Бағдаты көшесі – Ыстанбұлдың мәдениет пен шығармашылық тоғысқан ең белсенді аудандары. Бұл жерлерде қонақтар галереялар мен орталықтарды аралап, концерттер мен көрмелерге қатыса алады.
Босфор және Гастрономиялық Ләззат
Ыстанбұлға келген әр адамның міндетті түрде жасайтын саяхаты – Босфор бұғазы арқылы қайықпен серуендеу. Екі құрлықты жалғаған бұғаз жағалауындағы тарихи «ялы» үйлері, сарайлар мен керемет панорамалар ұмытылмас естеліктер сыйлайды.
Ыстанбұлдың тағамдар әлемі қаланың басты тартымдылықтарының бірі. Мұнда Michelin жұлдызды мейрамханалардан бастап, көшедегі дәмді асханалар, балық базарлары және дәстүрлі түрік таңғы асы ұсынылады. Түрік кофесін немесе шайын Босфор жағасында баклава немесе лукуммен бірге дәмдеу – қала мәдениетінің ажырамас бөлігі болып саналады.
Қаланың қарбаласынан алыстағы Принц аралдары табиғат пен тыныштықты сүйетіндер үшін тамаша бағыт. Жылы күндері аралдар велосипедпен серуендеуге және жағалауда демалуға мүмкіндік береді.
