Лоукостердің басына қара бұлт үйірілді: тағы да тексеріс

Аталған әуе компаниясының билет бағасын негізсіз көтергені анықталған жағдайда әкімшілік айыппұл салынады. Бұл туралы Бәсекелестікті қорғау және дамыту агенттігі төрағасының орынбасары Болат Сәмбетов мәлімдеді, деп жазады inbusiness.kz сайты Kazinform-ға сілтеме жасап.

“Жақында FlyArystan әуе компаниясына қатысты монополиялық жоғары баға мәселесі бойынша тергеу жүргізуді бастадық. Қазір тергеу жүріп жатыр, егер заңбұзушылықтар анықталса, тиісті шаралар қабылданады, – деді Болат Сәмбетов Сенат қабырғасында өткен іс-шарада.

Агенттік өкілінің мәлімдеуінше, аталған компанияға қатысты тергеу бұған дейін де жүргізілген.

“Монополиялық жоғары баға дегеніміз – белгілі бір бағыт бойынша, мысалы, Алматы немесе Шымкентке билет бағасының басқа компанияларға қарағанда айтарлықтай жоғары болуы. Біз алдымен компанияның нарықта үстемдік ету факторын анықтаймыз, яғни оның әділ бәсекеге әсер ету мүмкіндігін бағалаймыз. Егер компания нарықта үстемдік етіп, негізсіз жоғары баға белгілегені анықталса, онда монополиялық жоғары баға болып саналады”, – деді Б.Сәмбетов.

Егер заңбұзушылықтар анықталса әкімшілік айыппұл салынады. Айыппұл айналымның 5%-ын құрайды. Билет бағасын төмендету туралы нұсқау беріледі.

Айта кетейік, FlyArystan әуе компаниясы былтыр қаңтарда Air Astana-дан бөлініп шықты.