Қазақстан құрамасының капитаны Магомедрасул Магомедов Үндістандағы Rugby Premier League турнирінде қола жүлде жеңіп алды
Қазақстанның регби-7 ұлттық құрамасының капитаны Магомедрасул Магомедов Үндістанның Хайдарабад қаласында өткен HSBC Rugby Premier League (RPL) 2026 турнирінде сәтті өнер көрсетіп, қола жүлдеге ие болды.
Қазақстандық спортшы беделді халықаралық жарыста Bengaluru Bravehearts клубының сапында өнер көрсетті. Екі аптаға созылған турнир қорытындысы бойынша оның командасы үздік үштікке еніп, қола медаль жеңіп алды.
Rugby Premier League – әлемнің жетекші регбишілерін біріктіретін ең ірі коммерциялық регби-7 лигаларының бірі. Үндістан регби федерациясы мен GMR Sports қолдауымен ұйымдастырылатын турнир крикеттегі әйгілі IPL үлгісімен өтеді. Биылғы маусымда жарысқа Жаңа Зеландия, Фиджи, Оңтүстік Африка Республикасы, Австралия, Аргентина және Ирландия құрамаларының әлемдік деңгейдегі ойыншылары қатысты.
Осындай беделді додаға Қазақстан ұлттық құрамасының капитанының шақырылуы – отандық регбидің халықаралық деңгейде мойындалғанының айқын көрінісі. Магомедрасул Магомедов әлемнің үздік ойыншыларымен бір алаңда өнер көрсетіп қана қоймай, жоғары деңгейдегі қарсыластарға қарсы сенімді ойын өрнегін көрсетті. Оның қорғаныстағы сенімді әрекеттері мен шабуылдағы белсенділігі мамандардың жоғары бағасына ие болды.
Қазақстан регби федерациясының мәліметінше, мұндай халықаралық тәжірибе ұлттық құраманың алдағы құрлықтық жарыстардағы нәтижесіне оң әсерін тигізеді.
Қазақстан регби федерациясы Магомедрасул Магомедовты Rugby Premier League 2026 турниріндегі қола жүлдесімен құттықтап, оған ұлттық құрама сапында жаңа жеңістер тіледі.
