Қазақстан құрамасының ойыншылары Шымкенттегі балалар орталығына арнайы барды
Балаларды қорғау күніне орай Қазақстан ұлттық құрамасының футболшылары Шымкент қаласындағы қиын өмірлік жағдайға тап болған балаларды қолдау орталығында болып, тәрбиеленушілермен кездесті.
Іс-шараға ұлттық құрама сапында өнер көрсететін Нұралы Әліп, Сергей Малый, Ғалымжан Кенжебек, Максим Самородов, Жасұлан Әмір және Мағжан Тоқтыбай қатысты. Футболшылар балалармен бірге уақыт өткізіп, шағын футбол ойнап, түрлі тақырыпта әңгіме өрбітті.
Кездесу барысында бүлдіршіндер ұлттық құрама ойыншыларына көкейлеріндегі сұрақтарын қойып, естелік суретке түсті. Өз кезегінде футболшылар спорттағы жолы мен тәжірибесі туралы айтып, балаларға қолдау білдірді.
Шараның негізгі мақсаты – балаларға мерекелік көңіл күй сыйлау және оларды салауатты өмір салты мен спортқа баулу.
Кездесу соңында ұлттық құрама мүшелері орталық тәрбиеленушілеріне Қазақстан құрамасының жейделері мен естелік сыйлықтар табыс етті.
Қазақстан футбол федерациясы Халықаралық балаларды қорғау күніне орай барлық бүлдіршіндерге ізгі тілегін арнап, олардың армандары орындалып, болашағы жарқын болуын тіледі.
